ཁེར་རྐྱང་གི་འབོད་སྒྲ།།

གཏོལ་མེད་ས་མཐའ་ཡི་ལུང་ཁུག་ཏུ་སོན་།།

གངས་ཅན་བོད་ལྗོངས་དེ་མིག་ལམ་དུ་ཆར་།།

སྙིང་གི་བུ་ག་རུ་ན་ཟུགས་ཞིག་གཏོང་།།

སྐྱིད་པའི་ཕ་ཡུལ་བོད་ལྷང་ལྷང་དུ་དྲན་།།

ང་ཡི་བླ་མ༑༑

                              ཕྱག་འཚལ་ལོ༑༑༑

ཁྱེད་ནི་བདག་གི་མགོན་ཡིན་ཏེ༑༑

ཁྱེད་ནི་བདག་གི་བླ་མ་ཡིན༑༑

འཛམ་གླིང་ཡོངས་ཀྱི་ལམ་སྟོན་པ༑༑

ང་ཡི་སྐྱབས་མགོན་ཁྱེད་རང་ཡིན༑༑

                                                ཕགས་མཆོག་ཕྱག་ན་པད་མོ༑༑

                               སྤྱན་རས་གཟིགས་ཀྱི་རྣམ་སྤྲུལ༑༑

                               ༧གོངས་ས་སྐྱབས་མགོན་ཆེན་པོ༑༑

                               ཁྱེད་ལ་གུས་པའི་ན་མོ༑༑

ཆོས་ལུགས་ཡོད་དོ་ཅོག་ལ༑༑

གུས་ཀུར་གཅིག་མཚུངས་གནང་མཁན༑
མི་རིགས་དབྱེ་བ་མེད་པར༑༑
ཡོངས་ལ་གཅིག་འགྱུར་གནང་མཁན༑༑

ཁྱེད༑༑༑༑༑༑༑

ཁྱེད་མེད་པའི་དུས༑༑

དགུང་གི་སྟེང་དུ་ཡོད་པའི་བྱ་རྣམས་དང༑༑

རྒྱ་མཚོའི་ནང་གི་ནོར་བུ་རིན་ཆེན་དང༑༑

དྲི་ཞིམ་ཅན་གི་མེ་ཏོག་ཐམས་ཅད་ལས༑༑

གུས་པའི་སྙིང་གི་ནོར་བུ་ཁྱེད་རང་མཛེས༑༑

                                   ཁྱེད་ནི་ནམ་མཁའི་ལྷ་མོ་ལས་ཀྱང་མཛེས༑༑

                                   ཁྱེད་ཀྱི་གསུང་སྐད་ཁུ་བྱུག་ལས་ཀྱང་སྙན༑༑

                                   བུ་ཆུང་ང་ཡི་ཡིད་འཕྲོག་ལྷ་མོ་ཁྱེད་༑༑

                                   འཇིག་བརྟེན་ཀུན་གྱི་ནང་དུ་འགྲན་ཟླ་མེད༑༑

ཡིན་ཡང་ངེད་ཉིད་ལས་་འཕྲོ་བཟང་པོ་དེ༑༑

འབྱུང་བཞི་འཁྲུགས་སྟེ་རྐྱེན་ངན་བྱུང་བ་བལྟར༑༑

ཡུད་ཀྱི་ཁྱེད་དང་ང་ཡི་བྲེལ་བ་དེ༑༑

མཚན་མོའི་རྨི་ལམ་བཞིན་དུ་མེད་པར་གྱུར༑༑

                                     ད་ཆ་གུས་པས་འདས་པའི་དུས་རྣམས་ལ༑༑

                                     ཕྱིར་བལྟས་བྱས་ཏེ་མཆི་མ་གཏོང་བཞིན་ཡོད༑༑

                                     གུས་པའི་ཁྱེད་ལ་ཅངས་པའི་བརྩེ་བ་དེ༑༑

                                     རྡོ་སྟེང་རི་མོ་བཀོད་པ་བལྟ་བུ་ཡིན༑༑

གུས་པས་ཁྱེད་ལ་བརྩེ་བ་ཕུལ་ཡང་ཁྱེད་ཀྱིས་ང་ལ་སྤྱོད་ལོག་བྱས༑༑

ཁྱེད་ཀྱིས་གུས་པར་སྡུག་བསྔལ་གནང་ཡང་གུས་པའི་ཁྱེད་ལ་བདེ་བ་བསམ༑༑

ཅི་ཞིག་བྱུང་ཡང་གུས་པའི་མི་ཚེ་ནང་གི་ནོར་བུ་ཁྱེད་རང་ཡིན༑༑

གང་དུ་ཡོད་ཀྱང་མིག་ལམ་མདུན་དུ་ཉིན་ལྟར་ཁྱེད་ཀྱི་བཞིན་རས་ཤར༑༑

                        
                    སྐྱ་རེང་དུས་སུ་བྱ་སྐད་མ་ཐོས་ཉིན་ལྟར་ཁྱེད་ཀྱི་གསང་སྙན་ཐོས༑༑

                  བུ་ཆུང་ང་ཡི་མཛེས་ལྡན་ཁྱེད་ལ་བརྩེ་བ་ལྷད་མེད་ཕུལ་བའི་རྐྱེན༑༑་

                   སུ་འདྲ་ཞིག་དང་འགྲན་ཟླ་མེད་པའི་འོད་གདངས་ཅན་གི་བཞིན་རས་དེ༑༑

                  མཆན་མོའི་རྨི་ལམ་ཙམ་དུ་མིན་པར་བདངས་པའི་མིག་གི་མདུན་དུ་ཤར༑༑

ཁྱེད་རང་མེད་པའི་མོད་ལ་ད་ཆ་བསོད་ནམས་མེད་པའི་བུ་ཆུང་ང༑༑

ན་ཟླ་ལྷན་འཛོམས་དུས་སུ་ཡིན་ཡང་གུས་པ་ཉིན་ལྟར་ཁེར་རྐྱང་ལུས༑༑

དེ་བཞིན་ད་གཟོད་གུས་པའི་མི་ཚེ་གཤོག་པའི་མེད་པའི་བྱ་ལྟར་གྱུར༑༑

ཨ་སྔོན་སྟེང་དུ་ཕུར་བློ་ཡོད་ཀྱང་རང་གི་ལུས་པོའི་ལྕོག་པ་མེད༑༑

ཨ་མ་དྲན་གྶུ།།

              དྲིན་ཆེན་ཉི་མ།། 

སྐྱིད་སྡུག་འདུས་པའི་སྲིད་པའི་འཁོར་བ་འདི་ཡི་ནང་དུ་གུས་པར་ནོར་བུ་རིན་ཆེན་ལྟ་བུའི་རྩ་ཆེན་གྱི་མི་ལུས་འཐོབ་རྒྱུ་དེ་དྲིན་ཆེན་ཉི་མ་ཁྱེད་ཀྱི་བཀའ་དྲིན་ཡིན་ལ་ད་བར་ཁྱེད་ཀྱི་གུས་པར་བྱམས་སྐྱོང་དང་བསླབ་བྱ་གང་གནང་པ་རྣམས་ད་གཟོད་ངའི་སེམས་ཆུང་འདི་ནང་ཁྲ་ལྷམ་མེར་ཤར་ནས་ཡོད། གུས་པས་འཁོར་བ་འདི་ཡི་ནང་མིག་ཕྱེས་མ་ཐག་ནས་ད་བར་ཁྱེད་ཀྱི་གུས་པའི་དོན་དུ་དཀའ་སྡུག་གི་འཚོ་བ་ཇི་ཙམ་ཞིག་མྱོངས་ཡོད་པ་དེ་ད་གཟོད་ཕྱིར་དྲན་བྱེད་སྐབས་དྲིན་ཆེན་ཁྱེད་དངོས་ཡོད་སུ་བཀའ་དྲིན་ཆེན་པོ་ཡིན་པ་དེ་མཁའི་ཁྲོད་ནས་ན་བུན་མེད་པ་ཆགས་པ་ལྟར་གསལ་པོ་ཤེས་འཐུབ་བྱུང་སོང། བསོད་ནམ་མེད་པའི་བུ་ང་སྔོན་མ་བྱིས་པའི་དུས་སུ་ཡུམ་ཆེན་ཁྱེད་གམ་ཡོད་སྐབས་ཁྱེད་ཀྱིས་གང་གསུངས་པ་དེ་ལ་མི་ཉན་པར་སྤྱོད་ལོག་བྱས་པ་དང་དེ་མིན་ད་དུང་ཚམ་རེ་འཁང་ར་ཡང་བྱས་མྱོང་ཡོད་པས་ད་ལྟ་གུས་པར་ཁྱེད་ཀྱི་བྱམས་སྐྱོང་དང་བརྩེ་གདུང་དགོས་དུས་དྲིན་ཆེན་ཁྱེད་ཀྱི་བཀའ་དྲིན་དངོས་སུ་ལྷང་ལྷང་དྲན་བཞིན་འདུག། དེ་མིན་ད་ལྟ་གུས་པ་མི་ཡུལ་ས་མཐའ་ཡི་ལུང་པ་རུ་ཁེར་རྐྱང་ལྷག་དགོས་པ་ཡང་ངའི་བྱ་བ་ངན་པའི་འབྲས་བུ་ཞིག་ཡིན་ཨང་།།
དེར་བརྟེན་གུས་པས་འདས་པའི་ལོ་དེར་ཕྱིར་དྲན་བྱེད་སྐབས་དྲིན་ཆེན་ཁྱེད་ཀྱི་གུས་པའི་དོན་དུ་སྐུ་ལས་ལྷད་མེད་བསྐྱོན་པ་རྣམས་སེམས་ནང་དུ་གཞག་སྟེ་ད་གཟོད་གུས་པས་ཁྱེད་ཀྱི་བཀའ་དྲིན་འཇལ་འདོད་ཡོད་ཀྱང་ཁྱེད་ནི་སྡུག་བསྔལ་གྱི་འཁོར་བ་འདི་ནས་བདེ་བའི་ཞིང་དུ་འཕེབས་པར་བརྟེན་ཕྲན་ལ་ཡང་བྱེད་ཐབས་གང་ཡང་མི་འདུག་པའི་ཉིན་ལྟར་གུས་པའི་མཁའ་བའི་སྟེང་བལྟས་ཏེ་དྲིན་ཆེན་ཁྱེད་གང་དུ་བཞུགས་ཡོད་ཀྱང་སྐུ་ཁམས་བདེ་པོའི་ངང་གནས་ཡོད་པའི་གསོལ་བ་སྨོན་ལམ་འདེབས་བཞིན་ཡོད་པ་དང་དེ་ཕྱིར་གུས་པའི་ཁྱེད་ཀྱི་སྐུ་དཔར་ཉིན་ལྟར་ཨམ་ཕྲག་ནང་ཉར་བཞིན་ཡོད་། དྲིན་ཆེན་ཁྱེད་དང་ང་ཡི་བར་ལ་རྒྱང་རིང་ཇི་ཙམ་ཡོད་ཀྱང་ཁྱེད་ནི་བདག་གི་ཤ་རུས་ནས་བྲལ་དཀའ་བའི་སྙིང་གི་སྙིང་རྩ་ལྟ་བུ་ཡིན་ལ་ངེད་ཉིད་དབར་གྱི་འབྲེལ་བ་དེ་བརླག་པའི་ཉེ་བ་ནམ་ཡང་མེད་།། སྐབས་རེ་དྲིན་ཆེན་ཁྱེད་དྲན་ཏེ་གུས་པའི་མིག་ཆུང་གཉིས་ནས་མིག་ཆུ་རང་དབང་མེད་པར་ལྷུང་ཡོང་གི་འདུག་པས་ཨ་མ་ལགས་ཁྱེད་ད་ལྟ་ངས་སྙིང་ཁུངས་རུས་པའི་སྟེང་ནས་དྲན་བཞིན་ཡོད། ཁྱེད་མེད་པའི་མི་ཚེ་འདི་གཤོག་པ་མེད་པའི་བྱ་དང་མཚུངས་སྟེ་གུས་པའི་བྱ་བ་ཅི་ཞིག་བྱས་ཀྱང་དེར་སྙིང་པོ་མེད་པའི་འཚོར་བ་ཆེན་པོ་ཞིག་གཤར་ཡོང་གི་འདུག་ལ་འདས་པའི་ལོའི་ནང་གུས་པའི་དྲིན་ཆེན་ཁྱེད་ཀྱི་འཐུགས་སྐྱོ་དགོས་པའི་བྱ་བ་ཞིག་མ་ལྟོག་ཁྱེད་ཉིད་ལ་བདེ་བ་ཞིག་ཐོབ་ཆེད་བྱ་བ་གང་ཡང་བྱས་མྱོང་མེད་པར་དེ་ཡི་འབྲས་བུ་ཞིག་ཏུ་འགྱུར་།། དེའི་རྒྱུ་མཚན་ལ་བརྟེན་ནས་ཨ་མ་ལགས་ཁྱེད་ཀྱིས་ད་གཟོད་གུས་པ་ང་ཁེར་རྐྱང་བསྐྱུར་ནས་འཕེབས་པ་ཡང་ཡིན་སྲིད་ཡང་ན་ངེད་ཉིད་བྲལ་དགོས་པ་དེ་གུས་པར་བསོད་ནམས་མེད་པའི་ལས་ཞིག་ཡང་ཡིན་སྲིད། ད་གཟོད་གུས་པའི་མི་ཚེའི་གནས་སྟངས་ནི་མཚོ་ཀམ་པོའི་ནང་གི་ཉ་མོ་ལྟ་བུ་ཆགས་ཏེ་ལུད་སོང་བའི་དེ་ཕྱིར་དྲིན་ཆེན་ཁྱེད་མེད་པའི་མི་ཚེ་འདི་ནང་དཀའ་ངལ་མྱོང་བ་ལས་མི་ལུས་འདི་ལས་ད་ནི་འཆི་ན་འགྲིགས་བསམ་བཞིན་འདུག་ ཡིད་སྐྱོ་བའི་གནས་ཚུལ་ཞིག་ལ་བུ་ཆུང་ང་ཡི་མི་ལུས་འདི་ནང་དྲིན་ཆེན་ཁྱེད་ཀྱི་བཀའ་དྲིན་འཇལ་འཐུབ་མ་སོང་བའི་གལ་ཏེ་གུས་པར་བསྐྱར་དུ་མི་ལུས་འཐོབ་རྒྱུ་བྱུང་ན་དྲིན་ཆེན་ཁྱེད་གམ་སླར་ཡང་བྱིས་པའི་ཁུངས་སུ་ཚར་ལོངས་བྱ་རྒྱུ་ཡོང་བ་དང་དྲིན་ཆེན་ཁྱེད་ཀྱི་དྲིན་ལེན་ཡང་འཇལ་ཐུབ་པའི་ཉིན་ལྟར་བུ་ཆུང་ང་ཡིས་དཀོན་མཆོག་གསུམ་ལ་གསོལ་བ་སྨོན་ལམ་ཞུ་བཞིན་ཡོད། ང་ཡི་དྲིན་ཆེན་ཨ་མ་ལགས་ཁྱེད་ས་ཕྱོགས་གང་དུ་བཞུགས་ཡོད་ཀྱང་བུ་ཆུང་ང་ཡི་ཁྱེད་ཉིན་ལྟར་སེམས་ནང་དྲན་བཞིན་ཡོད་ 

              རང་སྲོག་བརྒྱ་ལ་ཉེ་ ང་ཚོ་གང་བྱེད་དགོས།།

      རྒྱལ་གཅེས་དཔའ་བོ་དཔའ་མོས།།

      ཁྲག་གི་མཆོད་མེ་འབུལ་བ།།

      བཙན་བྱོལ་བོད་མི་རྣམས་ཀྱི།།

     ཕྲན་བུ་མཁྱེན་པར་གནང་རོགས།།

ད་གཟོད་བོད་ནང་དུ་ཡོད་པའི་བོད་མི་རྣམས་ཀྱི་གནས་སྟངས་ནི་བསམ་ཡུལ་ལས་འདས་པ་ཞིག་ཆགས་ཡོད་ གང་ཡིན་ཟེར་ན་བོད་ནང་དུ་ཡོད་པའི་བོད་མི་ཚོས་བོད་དོན་ཐོག་ལ་སེམས་ཤུགས་དང་སེམས་ཁུར་བྱེད་པ་དང་དེ་མ་ཡིན་པའི་དམར་པོའི་གཞུང་ལ་ངོ་རྒོལ་ཤུགས་ཆེར་བྱེད་པར་བརྟེན་རྒྱ་ནག་གཞུང་གི་བོད་མི་ཕལ་མོ་ཆེ་འཛིན་བཟུང་བཙན་ཁྲིད་བྱས་པ་དང་དེ་རྣམས་གང་དུ་བཀག་ཉར་བྱས་ཡོད་པ་དང་ཁོང་རྣམས་གསོན་པོར་བཞུགས་ཡོད་མེད་སུས་ཞིག་གི་ཀྱང་གསལ་པོ་ཤེས་ཐུབ་མེད་པ་དེ་བཙན་བྱོལ་ནང་དུ་ཡོད་པའི་བོད་མི་ང་ཚོ་ཚང་མའི་མཁྱེན་གསལ་རེད་ད་དུང་ཡང་བོད་མི་ཚོས་རྒྱ་གཞུང་ལ་ངོ་རྒོལ་བྱས་བཞིན་ཡོད་ཡིན་ཡང་དམར་པོའི་གཞུང་གི་བོད་མི་ཚོས་དཀའ་ངལ་རྣམས་གསལ་ཐབས་བྱ་རྒྱུ་ལས་ཟློག་སྟེ་དེ་བས་ཀྱང་དམག་དང་དྲག་གནོན་བེད་སྤྱོད་གཏོང་སྟེ་བོད་ནང་དུ་ད་གཟོད་ཁྲག་གི་རྒྱུག་ཆུ་རྒྱུག་བཞིན་ཡོད། 

དེ་འདྲ་སོང་ཙང་བོད་ནང་གི་བོད་མི་རྣམས་ལ་ཡང་རང་དབང་སྤུ་ཙམ་ཞིག་མེད་པ་དེ་གསལ་པོ་བཤད་ཐུབ་ ཁོང་རྣམས་ནི་དམར་པོའི་གཞུང་གི་འོག་ཏུ་དཀའ་ངལ་ལྷད་མེད་མྱོང་བཞིན་ཡོད་ དེ་མ་ཟད་བོད་ནང་དུ་བོད་དོན་དང་བྲེལ་བའི་ལས་འགུལ་ཆུང་ཙ་ཞིག་སྤེལ་མ་ཐག་གང་ཟག་དེ་ལམ་གསེང་རྒྱ་ཡི་ཉེན་རྟོག་པའི་འཛིན་བཟུང་བྱེད་ཀྱིས་ཡོད་པས་བོད་ནང་དུ་སྔར་ལོ་༢༠༠༧ ནས་བཟུང་ད་བར་བོད་མི་རིགས་ཀྱི་བསྟན་པ་དང་ཆབ་སྲིད་ཀྱི་ཆེད་རྒྱལ་གཅེས་དཔའ་བོ་དཔའ་མོ་གྲངས་ལས་འདས་པ་ཞིག་གིས་རང་སྲོག་འཕངས་མེད་དུ་བློས་གཏང་མཛད་ནས་རང་ལུས་མཆོད་མེ་ཕུལ་བ་དེ་མ་ཟད་སྐུ་གཤེགས་ཕོ་མོ་ཡོངས་ཀྱི་མངོན་འདོད་ཀྱི་འབོད་ཚིག་གཉིས་ཡོད་པ་ནི་༧གོང་ས་མཆོག་བོད་ལ་འཕེབས་དགོས་པ་དང་བོད་མི་རིགས་ལ་རང་དབང་དགོས་ཟེར་བ་དེ་ཡིན་ ཁོང་རྣམས་ཀྱི་འབོད་ཚིག་དེ་སྒྲོག་བཞིན་ལག་གཉིས་ཐལ་མོ་སྦྱར་ནས་དཔའ་ཚབ་ཆེན་པོས་ངང་རང་ལུས་མེར་སྲེགས་གཏོང་བའི་མེ་རླབས་དེ་ད་གཟོད་འཛམ་གླིང་ཡོངས་ལ་ཁྱབ་ཡོད་ ཁོང་རྣམ་པས་སོ་སོའི་ཤ་རུས་ནས་བྲལ་དཀའ་བའི་ཕ་མ་སྤུན་མཆེད་དང་ནང་མི་ལས་ཀྱང་བོད་རྒྱལ་ཁབ་དེ་གཅེས་འཛིན་བྱས་ རང་སོ་སོའི་རྒྱལ་ཁབ་དོན་དུ་རང་ལུས་མཆོད་མེ་རུ་ཕུལ་བ་དེ་ང་ཚོ་བཙན་བྱོལ་ནང་དུ་ཡོད་པའི་བོད་མི་རྣམས་ལ་སླབ་བྱ་འམ་སེམས་ཤུགས་སྐྱེ་དགོས་པའི་གནས་ཚུལ་ཞིག་རེད། 

   ཚེ་འདས་དཔའ་བོ་དང་དཔའ་མོ་རྣམས་ཀྱི་མཛད་རྗེས་ནི་དངོས་ཡོད་གནས་ཚུལ་དུ་བསམ་ཡུལ་ལས་འདས་པ་ཞིག་རེད། ཚང་མས་མཁེན་གསལ་ལྟར་ན་བོད་ནང་དུ་དམར་པོའི་གཞུང་གི་དྲག་གནོན་ཇི་ཙམ་ཞིག་བྱེད་ཀྱི་ཡོད་ན་ཡང་བོད་མིའི་རང་སྐྱོང་རྩོད་རྒྱུའི་སེམས་ཤུགས་དེ་དེ་བས་ཀྱང་ཆེ་རུ་འགྲོ་རྒྱུ་དེ་ངེས་པ་རེད། དེ་འདྲ་ཡིན་པ་ཡིན་ཙང་ང་ཚོ་བཙན་བྱོལ་ནང་དུ་ཡོད་པའི་བོད་མི་རྣམས་ཀྱི་ད་གཟོད་བོད་མི་རིགས་དང་རྩ་དོན་ཆེད་རང་སྲོག་བློས་གཏང་མཛད་མཁན་གྱི་དཔའ་བོ་དཔའ་མོ་རྣམས་ཀྱི་ཆེད་བསྔོ་སྨོན་འམ་གསོལ་བ་འདེབས་རྒྱུ་ནི་ང་ཚོས་བྱེད་དགོས་པའི་བྱ་བ་མེད་དུ་མེད་རུང་བ་ཞིག་ཆགས་ཡོད། དེ་ལས་ལྷག་པའི་ང་ཚོ་རང་དབང་གི་ལུང་པར་ཡོད་པའི་བོད་མི་རྣམས་ཀྱི་རྒྱལ་གཅེས་དཔའ་བོ་དཔའ་མོས་མཛད་རྗེས་རྣམས་ཆུ་གཟོད་དུ་མི་འགྲོ་བའི་ཆེད་ཕྱིའི་རྒྱལ་ཁབ་ཀྱི་མི་རིགས་དང་བྲེལ་བ་བྱས་རྗེས་ཁོང་ཚོར་བོད་ནང་དུ་རང་ལུས་མེར་སྲེག་གཏོང་དང་གཏོང་བཞིན་པའི་སྐོར་དང་བོད་ནང་གི་བོད་མིའི་གནས་སྟངས། དེ་བཞིན་བོད་དོན་སྐོར་གང་མང་མང་གཅིག་འགྲེལ་བཤད་བསྐྱོན་རྒྱུ་དེ་ཧ་ཅང་གི་གལ་ཆེན་པོ་ཞིག་འཐོང་གི་འདུག། ད་ལྟ་ང་ཚོའི་དཔའ་བོ་དང་དཔའ་མོ་འདས་ཟིན་པ་རྣམས་གྲངས་ཐོག་ཏུ་བཀོད་པ་ཙམ་མ་ཡིན་པར་ཁོང་ཚོས་རང་ལུས་མེར་སྲེག་གཏོང་དགོས་པའི་རྒྱུ་མཚན་གང་ཡིན་པ་རྣམས་ཕྱི་རྒྱལ་ཁབ་ཀྱི་མི་རིགས་ལ་ངོ་དེབ་དང་དྲ་རྒྱའི་ཐོག་ནས་འགྲེལ་བཤད་གསལ་པོ་འམ་ཟབ་མོ་ཞིག་བསྐྱོན་ཐུབ་པས་ཐབས་ཤེས་བྱ་དགོས།

   གུས་པས་བསམ་ཚུལ་ལྟར་ན་ང་ཚོ་རང་དབང་གི་ལུང་པར་ཡོད་པའི་བོད་མི་རྣམས་ཀྱི་འདས་པོ་ཚོར་མྱ་ངན་གུས་འདུད་དང་གདུང་སེམས་མཉམ་བསྐྱེད་ཀྱི་རྣམ་པ་ཤུགས་ཆེན་བསྟན་རྗེས་མར་མའི་ཁྲོམ་སྐོར་དང་མ་ནི་འབུམ་ཙམ་འདོན་པ་ལས་ཕྱི་རྒྱལ་ཁབ་ཀྱི་མི་རིགས་དང་བོད་དོན་ཐོག་བགྲོ་གླེང་སྐར་མ་ཁ་ཤས་ཤིག་བྱེད་པ་དེ་ཕན་ཡོན་ཆེ་བ་ཞིག་ཡོད་རེད་བསམ་གི་འདུག། རྣམ་པ་ཚོའི་ངོས་ནས་ཡང་དེ་དང་དེ་འདྲ་བའི་ལས་འགུལ་སྤེལ་ཐུབ་པ་ཡིན་ན་ནམ་མཁའི་སྟེང་ནས་འབྲུག་སྒྲ་སྒྲོགས་པ་ལྟར་ང་ཚོས་ཡང་དམར་པོའི་གཞུང་དེ་ལྷོད་ལྷོད་ངང་འཇིགས་འཐུབ། དེ་འདྲ་སོང་ཙང་ང་ཚོ་བོད་མི་རྣམས་ཀྱི་ཕྱིའི་ཡུལ་མི་རྣམས་དང་གྲོགས་བྱེད་རྗེས་ཁོང་རྣམས་དང་བོད་ཀྱི་རྩ་དོན་ཐོག་བགྲོ་གླེང་བྱ་རྒྱུ་དེ་གཙོ་བོ་ཞིག་རེད་འདུག། ད་གཟོད་བོད་ནང་གི་གནས་སྟངས་ཛ་དྲག་ཆེ་རུ་འགྲོ་བཞིན་ཡོད་པའི་ ད་ནི་རང་དབང་གི་ལང་པར་གནས་ཡོད་པའི་བོད་མི་ཚོ་ཉོན་རྨོངས་པའི་གཉིད་ལས་གསལ་ནས་ལས་འགུལ་འདྲ་མིན་ཞིག་སྤེལ་མ་འཐུབ་ན་བོད་ནང་དུ་རྒྱ་ནག་གཞུང་གི་འོག་དྲག་གནོན་ཆེན་པོའི་ངང་དཀའ་ངལ་ལྷད་མེད་མྱོང་བཞིན་ཡོད་པའི་བོད་རིགས་སྤུན་ཟླ་རྣམས་ལ་ཡང་ངོ་ཚ་དགོས་པའི་གནས་ཚུལ་ཞིག་རེད། དེའི་ཕྱིར་རང་དབང་ལུང་པར་ཡོད་པའི་སྤུན་ཟླ་རྣམས་ལ་གུས་པའི་རེ་སྨོན་ཞུ་རྒྱུ་ལ་བོད་ཀྱི་ས་ཆ་དེ་བོད་མིས་འཛིན་ཐབས་གྱ་རྒྱུ་དང་བོད་མི་ཚོ་མཐུན་སྒྲིལ་བྱེད་དེ་བོད་ནང་གི་གནས་སྟངས་སྐོར་གང་ཤེས་པ་རྣམས་ཕྱིའི་ཡུལ་མི་རྣམས་ལ་འགྲེལ་བཤད་གང་འཐུབ་བསྐྱོན་རོགས་ཁོང་ཚོར་བོད་ནང་དུ་རྒྱ་ནག་གི་སྡུག་རྩུབ་སྐོར་གསལ་བཤད་ཟབ་པོ་བསྐྱོན་རོགས་ མཐའ་དོན་༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་སྐུ་ཚེ་ཞབས་པད་ཁྲི་ལོ་བརྟན་པ་དང་བོད་དོན་བདེན་མཐའ་མྱུར་དུ་གསལ་བ་དང་དེ་བཞིན་ལྷ་སའི་བར་འཁོར་ནང་དུ་གཞི་རྗེའི་བོད་མི་མཉམ་འཛོམས་ཐོག་བོད་རྒྱལ་ཁབ་ཆེན་པོའི་རྒྱལ་གླུ་གཏོང་རྒྱུ་ཡོང་བའི་ཉི་མ་མྱུར་ནས་མྱུར་དུ་ཤར་བའི་སྨོན་ལམ་དང་བཅས་བོད་རྒྱལ་ལོ།།།།།

ཁྱེད་གང་དུ་བཞུག་ཡོད།།

                                        དྲིན་ཆེན་ཨ་མ་ལགས།།

མུན་ནག་གི་བཏུམ་པའི་ཡུལ་དུ།།       

ཉི་མའི་འོད་མདངས་ཞིག་འཕྲོ་དུས།།

སྐྱེ་བོས་གང་ཟག་གི་འཕྲོད་ན།།

སླར་ཡང་རྒྱུད་ལམ་ཞིག་ཤར་ཡོད།།

                                    དེ་བཞིན་སྐྱིད་སྡུག་གི་ལུས་འདིར།།

                                     ཚེ་སྔོན་ལས་འཕྲོ་དང་འདུས་པའི།།

                                     དྲིན་ཆེན་སྐྱེད་མ་ཁྱེད་འཕྲད་འབྱུང།།

                                    འཇིག་རྟེན་དཀའ་སྡུག་ལས་ཐར་སོང།།

ཁྱེད་ཀྱི་བྱམས་སྐྱོང་དང་བརྩེ་བའི།།

དཀའ་ཚེགས་ཇི་ཙམ་ཞིག་ཕྲད་ཀྱང།།

དཀའ་ངལ་སྤུ་ཙམ་ཞིག་མི་འཚོར།།

ཡུད་ཀྱི་དཀའ་ངལ་དེ་མདོག་སོང།།

                                       བུ་ང་ཁྱེད་དང་ཐུད་པ།།

                                       སྔོན་བསགས་ལས་ཞིག་ཡིན་འགྲོ།།

                                       དེ་མིན་ཁྱེད་གམ་བསྡད་རྒྱུ།།

                                      གུས་པར་བསོད་ནམ་ཨེ་ཡོད།།

ཕྲན་གྱི་མི་ཚེ་འདི་ནང།།

དྲིན་ཆེན་ཀྱེ་མ་ཁྱེད་ཀྱ།།

བསླབ་བྱ་ཡོད་དོ་ཅོག་པ།།

སེམས་པའི་ནང་དུ་སིམ་སོང།།

                                      འོན་ཀྱང་ལམ་ཕྲན་འདི་རུ།།

                                     གུས་པ་ལོ་ཤས་གོང་དུ།།

                                     དྲིན་ཆེན་ཉི་མ་ཁྱེད་ཀྱི།།

                                    བསྐྱུར་ནས་ཕེབས་དོན་ཅི་ཡིན།།

ཁྱེད་ཉིད་མེད་པའི་ཚེ་འདིར།།

སྙིང་པོ་ཅི་ཡང་མི་འདུག།།

དེ་ལས་མི་ལུས་འདི་ནས།།

ད་ནི་འཆི་ན་དགའ་འདུག།།

                                  ཨ་མ་ང་ཡི་ཨ་མ།།

                                  ང་ཡི་དྲིན་ཆེན་ཉི་མ།།

                                 བུ་ང་ཁེར་རྐྱང་བསྐྱུར་ནས།།

                                ཁྱེད་ཉིད་གང་དུ་གཞུགས་ཡོད།།

གུས་པ་ཁྱེད་ཉིད་དྲན་ངོགས།།

འགྲོ་རྒྱུ་བྱུང་ན་བསམ་གྱི།།

འོན་ཀྱང་ལས་དབང་རྐྱེན་གྱི།།

ཁྱེད་སར་ཡོང་ཐབས་མི་འདུག།།

                                      ཉི་མ་ལ་བལྟས་སོང།།

                             གྲིབ་བསིལ་ས་ལ་འབབ་སོང།།

                              ང་ཡི་དྲིན་ཆེན་ཨ་མ།།

                             བདེ་བའི་ཞིང་དུ་འཕེབས་སོང།།

མཆོག་གསུམ་ཐུགས་རྗེ་གཟིགས་རོགས།།

གུས་པར་མགོན་སྐྱབས་གནང་རོགས།།

ལས་ཀྱི་འཕྲང་རིང་འདི་ནས།།

ཀྱེ་མའི་དྲན་ངོགས་འཕུད་རོགས།།  

                                       

                                      ཁྱེད་ཀྱི་གམ་དུ་ཡོད་དུས།།

                            ཁྱེད་ཀྱི་བཀའ་དྲིན་མ་ཚོར།།

                            ད་ལེན་ཁེར་རྐྱང་ལུས་དུས།།

                            མིག་ཆུ་རང་མེད་ཤོར་སོང།།

ད་ནི་བུ་ཆུང་ང་རང།།

ཁྱེད་ཉིད་མེད་པའི་རྐྱེན་གྱི།།

མི་ཚེ་སྟོང་པ་འདི་ནང།།

བདེ་བ་སྤུ་ཙམ་མི་འདུག།།

                           འདི་ནི་བུ་ཆུང་འཇམ་དཔལ་གྱི།།

                           ཁེར་རྐྱང་ལུས་པའི་གཏམ་ཞིག་ཡིན།།

                           ཁྱེད་རང་མེད་པའི་ལོ་འདི་ནང།།

                           སྙིང་པོ་མེད་པའི་འཚོར་སྣང་ཡིན།།

ཡིན་ན་ཡང།།།།།།།།།།།།།།།།

                            སྔོན་བསགས་ལས་དབང་གི་བཀའ་རྒྱ།།

                            སུས་ཀྱང་ཟློག་ཐབས་ཤིག་མི་འདུག།།

                            ཐམས་ཅད་ལས་དབང་དུ་བསྒོམས་ནས།།

                            ཐུགས་སེམས་ལྷོད་ལྷོད་ཅིག་གནང་རོགས།།།།       

     

                                      

གུས་པའི་རེ་སྨོན།།།

                                  འཛིན་གྲོགས་ལགས།།

  སྨོན་ལམ་སྨོན་ལམ་གུས་པའི་འདེབས་བཞིན་ཡོད།།

མཆོག་གསུམ་མཆོག་གསུམ་ཟེར་བ་ཁ་ཙམ་མིན།།

ཆུང་གྲོགས་འཛིན་གྲོགས་ཁྱེད་ལ་ཕྲད་བཞིན་པའི།།

མི་འདོད་སྡུག་བསྔལ་འབྱུང་བ་ཆོས་ཉིད་ཡིན།།

                       ཁྱེད་ཀྱི་ཕ་བཟང་ཁྱེད་དང་བྲལ་ན་ཡང།།

                       ཐུགས་སེམས་སྐྱོ་བ་མ་གནང་འཛིན་འགྲོགས་ལགས།།

                       ཉ་མ་ང་ཚོས་དུས་རྒྱུན་ཁོང་གྱི་ཆེད།།

                       ཉིན་མཚན་དབྱེར་མེད་གསོལ་བ་འདེབས་བཞིན་ཡོད།།

དགའ་བ་བསྐྱོ་བ་འཇིག་རྟེན་ཆོས་ཉིད་ཡིན།།

ཕ་བཟང་ཚེ་ལས་འདས་པ་སྡུག་བསྔལ་ཡིན།།

མ་བཟང་ཁྱེད་གཉམ་ཡོད་པ་བསོད་ནམ་ཡིན།།

འདི་ནི་སྐྱིད་སྡུག་ཟུང་བྲེལ་འཁོར་བ་ཡིན།།

                        ལོ་མང་ཁོ་བོའི་གམ་དུ་ཚོ་བ་སྐྱེལ།།

                       ད་ལྟ་ཟླ་ཤས་ཁོང་དང་བྲལ་བའི་རྐྱེན།།

                       ཁྱེད་ཉིད་བར་གྱི་ལས་འགྲོ་བཟང་པོ་དེ།།

                      ཝ་ལེར་ཝ་ལེར་ཉམས་པའི་རྐྱེན་ཡིན་འགྲོ།།

འཆི་བར་བཀག་ཐབས་བྱ་རྒྱུ་ལག་ཏུ་མེད།།

སྐྱེས་བ་ཐམས་ཅད་འཆི་རྒྱུ་ཆོས་ཉིད་ཡིན།།

དེར་བརྟེན་ཚེ་འདས་ཕ་བཟང་ཁོང་གི་ཆེད།།

སྨོན་ལམ་གཏིང་ཟབས་འདེབས་ན་ཕན་ཡོན་ཆེ།།

                       ཁོང་གི་དོན་དུ་མཆི་མ་ལྷུང་བ་ལས།

                       ཉིན་རེ་ཉིན་རེ་མཆོད་མེ་འབུལ་བ་དགའ།།

                      དེ་བཞིན་ཉིན་ལྟར་མར་མེ་འབུལ་བ་ན།།

                       ཁོང་ལ་ལམ་སྟོན་བྱ་བར་ཕན་ཡོན་ཆེ།།

མཆོག་གསུམ་རྣམས་ལ་སྙིང་རྗེ་ཡོད་པ་ན།།

འཛིན་འགྲོགས་ཁོང་ལ་ཕྲད་པའི་སྡུག་བསྔལ་དེ།།

དེ་བཞིན་བསྐྱར་དུ་འཛིན་གྲོགས་གཞན་རྣམས་ལ།།

མྱོང་དགོས་མེད་པར་འབད་དུ་མཛད་ཅིག་ཀྱེ།།

                       སྨོན་ལམ་འདེབས་ན་ཁོ་བོར་ཕན་ཡོན་ཆེ།།

                       མཆི་མ་གཏོང་ན་ཁོ་བོར་དཀའ་ངལ་ཆེ།།

                       དེ་ཕྱིར་ཁོང་ཆེད་མཆི་མ་གཏོང་བ་ལས།།

                       སྨོན་ལམ་ཚིག་གསུམ་འདེབས་ན་ནུས་སྟོབས་ཆེ།།

དེ་ལྟར་ཉ་མ་ང་ཡི་བསམ་ཚུལ་ལ།།

ཤ་ཚ་ཤ་ཚ་བརྗོད་ན་ཨེ་ཕན་ཡོང།།

སྙིང་རྗེ་སྙིང་རྗེ་ཟེར་ཞིང་བསྡོད་པ་ལས།།

སྨོན་ལམ་ཚིག་གསུམ་འདེབས་ན་ཕན་ཡོན་ཆེ།།

                          ཨ་ཕ་ཨ་ཕ་ཟེར་ཞིང་བསྡོད་པ་དང།།

                          འ་ར་འུ་རེ་བྱས་ནས་ངུས་པ་ལས།།

                          སྙིང་ཁུངས་རུས་པའི་གཏིང་ནས་ཕ་བཟང་ཅེད།།

                          སྨོན་ལམ་ཚིག་གསུམ་འདེབས་ན་ཕན་ཡོན་ཆེ།།

གུས་པའི་ཚིགས་གཅད་འདི་ཡི་ནང་དོན་ལ།།

བསམ་བཞིན་བསམ་པར་བྱེད་རོགས་འཛིན་འགྲོགས་།།

ཕྲན་གྱི་ཁྱེད་ལ་ཕྱག་རོགས་ཞུས་མ་ཐུབ།།

ཡིན་ཡང་སྨོན་ལམ་གཏིང་ཟབས་འདེབས་བཞིན་ཡོད།།

                                    བུ་ཆུང་འཇམ་དཔལ་ང་ཡི་འཛིན་གྲོགས་ལ།

                                    དཀའ་ངལ་གདོང་ལེན་བྱ་རྒྱུའི་རེ་སྨོན་ཞུ།།